Karjalan Kielen Kodi oppis kylviä kielipezän siemenii
Ainavo täkse aigua karjalankieline kielipezä ruadau Vieljärven kyläs Karjalan Kielen Kois nellätty vuottu. Sen tavoiteh on ruadua kui omien lapsien da perehien hyväkse pidäjen tävven ruadopäivän kestäjiä karjalankielisty päivyhoiduo pienile lapsile, mugai sanella omas ruavos mierole, annella tiijot da nerot. Karjalan Kielen Koin yhtistyksen paginanvedäjän Ol’ga Gokkojevan sanoin mugah, joga vuottu hyö hommatah pari-kolme opastundukerdua kui omih kielipezän ruadajih niškoi, mugai tulolazile. Opastunduseminuarat, kielikursat da ruadopajat kuulutah KKK:n toimindah.
Tämänkerdazeh seminuarah käydih päiväčelleh lapsienkazvattajat Anuksen linnaspäi, Tuuksil, Kotkatjärvel, Miägriel da Priäžäspäi – kaikis nämmis kohtis päivykodilois jo ammui opastetah tippazii karjalua. Naizet suadih nähtä ilmizin, kui ruadau kielipezä da kuulta, kui pidäy sie ruadua, midä tieduo da neruo pidäy olla. Opastajannu oli KKK:n ruadai, kielipezä-dieluo maltai Natalja Antonova.
– Toizien kannattamine da opastamine meile on anitärgei. Vuottazimmo kielipezien avavundua toizih kohtih, sit meilegi olis parembi mieli ruadua. Yksin on jygei. Dai hyvin ellendämmö, ku luadie kielipezii meijän ololois on ylen jygei. Pidäy olla ellendämisty da abuu kui vallasolijois, mugai perehispäi. Kielipezät oldas ylen syvä kieliruado, ga vikse myö, karjalazet, emmo ole sissäh lujat, ku suaha niidy omih kohtih. Seminuaras olijat rahvas ihan kaikin miellyttih meijän kielipezän ruandah, ga enimät ei uskota, ku niidy suau heijän eländykohtih, sanelou Natalja.
Yhtelläh yksi ainavo kielipezä-juohatus sinä piän rodih. Priäžäläzet rahvas sanottih, ku allettih ajatella kielipezän suandua Priäžäh. Elämä-etnokul’tuurizen keskuksen ruadajat Tatjana Seppänen da Jelena Ruppijeva da päivykoin ruadai Natalja Petrova ruvetah ajamah sidä dieluo omas kyläs edehpäi.
Ližiä lugekkua Omas Muas 30. syvyskuudu 2020
