Nuožarven voinumustomerkih ližättih nimii
Mustomerki voinal olluzile omamualazile pystytettih Nuožarveh vie vuvvennu 1985. Voinumustomerkis oli 141 nimie. Nygöi ližättih vie yksi – tiijustelijan Jevdokija Mihailovna Sergejevan nimi. Sergejevan Dus’a oli Mikkeläspäi, loppi Nuožarven školan da ruadoi opastajannu Kutižmas. Neidizel oli vaiku 23 vuottu igiä, konzu häi sai surman. Dus’an kalmu ei ole tietois, ga nygöi hänen nimi ei jiä unohtuksih.
– Häi oli erillizen joukon saldatannu. Vuvvennu 1943 Dus’ua yhtes komandiiran Konstantin Zaharovič Manzirevan kel työttih suomelazien tagavoh. Tiijustusoperatsien aigua heidy tapettih. Surman sai Sergejevan Dus’a dai Konstantin Manzirev. Pahakse mieldy, heijän nimet nikus ei olla pandu igäzeh mustoh.., sanoi Priäžän Elämä-etnokul’tuurukeskuksen ruadai Tatjana Seppänen.
Mustomerkin avattuu miitingan jälles häi pidi kul’tuurukois luvendon Sergejevan Dus’ah näh.
Nuožarveh da lähikylih jo ei jiännyh eloh ni yhty voinuveteruanua. Sendäh nuožarveläzet ližättih mustomerkih vie 60 voinuveteruanoin nimie. Niidy ečittih da tarkistettih vojenkomuatoin kauti, kyzeltih rahvahal. Uvvet nimet pandih nelläle uvvele pliitale, kuduat azetettih čurah-toizeh suures mustomerkis.
Ližiä lugekkua täs.
