24.-26. sulakud Karjalas tehtihe ”Karjalan Voden opendai”-konkurs. Sihe ühtni 33 opendajad. Opendajile tariž oli päzuda läbi erazvuiččiš kodvindoiš. Egläi žürijouk väliči konkursan finalistad, kudambad jatksiba voibištelendad Kostomukša-lidnas. Sigä heile pidi ezitada Kostomukšad erazvuiččiš polišpäi.
— Minai oli “Ekologii” tem. Olim Kostomukšan kaičuztahos. Minä tegin penikaižen teatrozutelusen, miččes vändin, kut opendai tarjoiči äilapseližele perehele tehta tundištoituzmatk neche kaičuztahoze, starinoičeb vepsän kelen opendai Anastasia Jevtušenko.
Anastasia radab školas kümne vot. Konkursaha hän ühtni koumanden kerdan. Täl vodel hän tegihe ühteks “Karjalan Voden opendai” -konkursan vägestajišpäi.
— Lujas pit’kha da tarkašti vaumičimoi konkusaha. Tahtoin kaikele Venämale srainoita vepsläižiš. Ülendamoi ičelain. Minä sabustin sen, midä muga pit’kha tahtoin. Tämbei minai oli kündlid sil’miš ozaspäi. Kitän kaikid, ken abuti minei da tugezi mindai, ližazi Anastasia.
Johtutam, miše konkursas oli nel’l’ nominacijad: “Deb’ut”, ”Kodikeliden opendai”, “Klassan ohjandai” da “Opendai”. Vägestajad ezitaba Karjalad “Venäman Voden opendai” -konkursal Tatarstanas sügüz’kus.