Suomalaiž-ugrilaižes školas lopihe vepsän kelen nedal’
Kaikuččen päivän Vepsän kelen nedalil Petroskoin Suomalaiž-ugrilaižes školas mäniba miččed-se vepsän rahvahan kul’turaha sidotud azjtegod. Ezmärgen oli sätud literaturiž-muzikaline vastuz. Lapsid tundištoittihe vepsän literaturan avtoroidenke da starinoitihe, kut avtoroiden da fol’kloran tekstoid voib kävutada nügüdläižiš muzikaližiš aranžirovkoiš. Tožnargen lapsed ühtniba interaktivižihe vändoihe, koumanz’päivän kirjutiba sanelusen vepsän kelel. Nellänz’päivän školas oliba vepsän kelen ozutandurokad Karjalan “Voden opendai” -konkursan aigan. A tämbei openikoidennoks tuliba “Kipinä” -kulehtesen radnikad.
— Tämbei meiden sebranikad “Periodikaspäi” vediba interaktivižen urokan 4.da 5.-klassoiden openikoile. Mö sam necen kulehtesen da paksus kävutoitam sidä ičemoi rados. Kaik lapsed 4.-klassoišpäi zavottes tedaba “Kipinäd”, sanui vepsän kelen opendai Nadežda Petrova.
“Vepsän kelen nedal’” -akcijaha ühtniba kut lapsed, kudambad opendaba školas vepsän kel’t, muga nened-ki, kudambad opendaba suomen da karjalan kelid. Petroskoin Suomalaiž-ugrilaižen školan opendajad toivoba, miše kaik lapsed saiba uzid melentartuižid tedoid necen nedalin aigan.
