Petroskoissa vietettih Karjalan piämiehen rinnalla toimijan karjalaisien, vepšäläisien ta šuomelaisien etuštajien neuvoššon vuuvven 2024 enšimmäini issunto. Šen piäteemoina oltih Onegarannan piirin vepšäläisien kyläkuntien hallintojen ta kyläkuntien alovehella toimijien tevollisušyritykšien yhteistyö šekä Karjalan tašavallašša toteutettavat ohjelmat, kumpaset autetah yrittäjätoiminnan viettämistä.
— Vepšäläisissä kyläkunnissa toimijat tevollisušyritykšet annetah rahakanatušta, kannatetah etnokulttuuritilaisukšie, rahotetah paikallisien alottehien tukiohjelmie, korošti issunnon vetäjä, Karjalan tašavallan šisäpolitiikan varajohtaja Igor’ Korsakov.
— Kalajoven alovehella toimiu 18 yrityštä. Kaikkieh vuotena 2023 ne omatahtosešti šijotettih kyläkunnan hyväkši 275 tuhatta rupl’ua. Vuotena 2024 yhteistyöššä yritykšien kera šuunnittelemma alkua rakentua A. M. Lisitsinalla nimitettyö musejuo Kalajoven kyläššä, kerto Kalajoven kyläkunnan johtaja Mihail Pol’akov
Šamoin issunnošša esiinnyttih Šokšan vepšäläisen kyläkunnan johtaja Viktorija Butorina ta Karjalan tašavallan työ- ta työššäolohallinnon varajohtaja Jurii Borisov.