“Uhtuan kapsakki” kävi esityšmatoilla Vienua myöten
Artistat esitettih Muamon rakkahuon voima -spektaklie, mi on ohjattu Irina Rinkevičin Lemminkäisen muamo -käsikirjutukšen mukah. Kaikissa paikoissa näyttelijäryhmyä hyvin lämpimäšti otettih vaštah.
– Vapaita paikkoja šaliloissa melkein ei ollun. Esitykšen aikana kačontasalissa oli oikein hil’l’aista, kaččojat oltih täysin esitykšeššä ta rehellisešti tunnettih kaikkie tuntehie, mimmosie artistat näytettih. Lopušša meilä lahjotettih äijän räpytykšie, šano teatterin ohjuaja Nadežda Rastrigina.
Eri-ikäset artistat oikein lämpimäšti näytettih Kalevala-eepossan tunnetun Lemminkäini-urohon elämän juonta. Heijän esityš koški monien kaččojien šieluo. Rohkie ta poikkoi šankari läksi Tuonelah eččimäh šotua ta šeikkailuja, ka kuatu Tuonelan vesissä. Vain muamon rakkahuon voima virotti Lemminkäisen jälelläh elävien muailmah. Hieno naini piäsi kuollehien muailmah, kappalehista keräsi poikuah, ta niin myöššytti hänen henken. Monien kaččojien šilmissä šeisottih kyynälet.
Kaččojat kiitetäh Uhtuan kapšakki -teatterin artisoja Galina Tabačnikovua, Mihail Tikkaista, Jevgenija Haverista, Ol’ga Kuz’minua, Irina Dobrininua, Julija Petrovua, Aleksandr Korol’kovie, Antonina Korenevua, L’ubov’ F’odorovua, Tatjana Lesoista, Milena Ivanovua, Anna Ivanovua šekä teatterin ohjuajua Nadežda Rastriginua ta iäniohjuajua Anatolii Rastriginie.
Muamon rakkahuon voima -näytelmä esitettih “Kalevalan” alkuh -projektin rajoissa, kummaista kannattau Presidentin granttien šiätijö.
