Suojärven piirin kodialovehen histourien muzei on täyttänyh viizi vuottu
Kodialovehen histourien muzei avattih Suojärveh 25. sulakuudu 2017. Enne muzein ezinehet oldih ruokos bojukunnivon pertis, kudai avattih Suuren Ižänmuallizen voinan loppiettuu Nevvostoliiton urhomiehen Filipp Gorelenkon nimizeh školah. Vuvvennu 2017 sponsoroin avul školamuzeile annettih suurembat tilat eländykois Kaimanovan pihal. Pertit muzeih niškoi kohendettih, azetettih niilöih uvvet sähkölangat da pertilomut, suadih uuttu tehniekkiägi.
Nygöi muzeis ruadau kaksi ozutteluu, yksi on omistettu voinan histouriele da toine –etnogruafiele. Viijes vuvves muzein fondat kazvettih, äijät vehkehet tuodih paikallizet eläjät. Erilazien projektoin abuden’goih muzeih azetettihgi uvvet ozutusikkunat. Sit, mil eläy muzei nygöi, sanellah 29. sulakuudu sen merkipäiväle omistettulois pidolois.
– Piätteniččän muzeis pietäh pyöryžy stola, kuduan aigua sanellah muzein brendas. Muzeih niškoi on jo valmis oma tunnusmerki, tuliel aigua ruvetah valmistamah muzein ainavoluaduzii suveniiroi, sanou muzein johtai Natalja Larionova.
Sulakuun 29. päivänny Suojärves azetetahgi mustolaudu Klavdija Gartvičan kunnivokse, kudai oli Gorelenkon nimizes školas toimijan muzein johtajannu.
Ližiä tieduo merkipäivän pidolois voibi tiijustua muzein Vkontakte-sivul.
