“Runostarinat” tutuššetah lukijua Arhippa Perttusen runoih. Dmitrii Dmitrijev valičči tunnetun runonlaulajan šeiččemen runuo, valmisti niijen mukah taitehellisen kerronnan lapšilla šekä piirušti mukavie kuvitukšie. Niin kokomukšeh kuuluu šeiččemen runostarinua – “Šampo”, “Matka Vipusen luokše”, “Kannel”, “Kilpalaulanta”, “Kilpakos’s’onta”, “Hiijen hirven hiihäntä” ta “Päivilän pitoja”.
Kirjan presentatijo piettih karjalaisella runoperintehellä ta pohjosen kantakanšojen eeppisellä perinnöllä omissetušša seminarissa, mi piettih Petroskoissa šyyškuun lopušša.
Seminarissa Dmitrii Dmitrijev korošti, jotta karjalaiset runot on melko vaikie, ka mukava materiali.
– Miun tarkotukšena oli niin kertuo Arhippa Perttusen runoja lapšilla, jotta kiinnoššuttua heitä ta jotta heilä ei tulis ikävä lukie niitä. Miun piti opaštuo pakajamah lapšien kielellä, šelväššä muuvvošša starinoija runojen juonie šekä kiertyä alkuperäsien runojen terävie kohtie, šaneli taiteilija omašša esitykšeššä.
Dmitrii Dmitrijev kerto, jotta kirjan kuvitukšet lisätäh tekstie, a teksti šelittäy mitä tapahtuu piiruššukšissa – tämä keškenäini vaikutuš peruštau dinamiikkua ta še miellyttäy lapšie.
Seminarin kaikki ošanottajat šuatih uuvven kirjan kappalehie lahjakši.
Runostarinat-kokomuš on painettu Karjalan tašavallan kanšallisen ta alovehellisen politiikan ministerijön tuvella. Kirja ei ole myötävä.