Tänävuon jarmanku vähäzel eruou endizis: räkki da vihmatoi kezä ei andanuh hyviä uudistu Karjalas.
Jarmankal on enimite suvespäi tuoduu fruktua, oriehua, metty. Kartohkua on vähä, myvväh enimite Anuksen piiris Alavozes kazvatettuu. Segi ei ole huovis: yhtes kohtas kilo maksau 35 rubl’ua, toizes – 30 rubl’ua. Ouveššiloin čupus tavan mugah löydyygi Tuuksen kylän kapustua. Fruktua tänävuon on moneh kerdah enämbi, pidäy vaiku tarkah kaččuo da verrata hinnat. Yhtes kohtas kilo granuattua maksau 145 rubl’ua, toizes – 800 rubl’ua. Aniharvah lövvät Petroskoin laukas manguo, ga jarmankas se voibi ostua – kilos annat 2 000 rubl’ua.
Paiči lihahistu, kalahistu da maidohistu jarmankas on Pskovan saviastieloi, Leningruadan alovehel kazvatettuloi kukkien, puuloin, tuhjoloin da eri dekoratiivizien kazviloin taimenii, kai kodijänöigi voibi ostua.
Jarmankas voibi ostuagi Suomespäi tuoduu: alussobua, koufeidu, čuajuu, šokoluadua da muudu. Ga pandemien ololois Suomespäi tuovut tavarat pyzytäh hinnois.
– Äijängo maksau tämä ruskei čuaju slonanke? kyzyy ostai Suomen tavaroin myöjäl.
– 1 650 rubl’ua.
– Passibo, ei pie.