Karjalan rintaman musejo on avattu Karjalan tašavallan peruštamisen 100-vuotisjuhlakši Venäjän presidentin miäräykšen ta federalisen Karjalan kehityšohjelman mukah.
Karjalan rintaman musejon juhlalliset avajaiset piettih Karjalan vapauttamisen fašistien miehitykšeštä päivänä (30. šyyškuuta). Seremonijah otettih ošua KT:n piämieš Artur Parfenčikov, Venäjän Federatijon puoluššušministerin šijahini Andrei Kartapolov, VF:n kulttuuriministerin šijahini Ol’ga Jarilova, Federatijon Neuvošton Karjalan etuštaja Igor’ Zubarev, KT:n Lakienluajintakokoukšen piämieš Elissan Šandalovič.
– Ainutluatuni ekspositijo on peruššettu muissokši kantatuattoloista meilä, meijän lapšilla, punukoilla, pravopunukoilla, meijän jälkiläisillä, jotta myö aina muistasima, millä hinnalla šaima rauhallisen elämän, korošti musejon avajaisissa piämieš Parfenčikov.
Musejo šijoutuu istorijallisešša rakennukšešša – šotavuosina šielä oli Karjalan rintaman Belomorskin šotilašošašto. Šen ekspositijo on valmissettu muantietoperuštehen mukah Leningradin alovehelta Murmanskin alovehella Ribačii-niemimualla šuaten. Näyttelyššä on esitetty kaikki tämän alovehen šotilašošaštot, rintaman šelkämä, keškityšleirit.
Esinehie musejon kokoelmah tuotih eri paikoista: Karjalan kanšallisen musejon fondiloista, eččijien löytölöistä, esinehie yksityiskokoelmista.
Karjalan rintaman musejon avajaisissa Tašavallan valtijonpalkinnot oli myönnetty ihmisillä, kumpaset tuotih šuuri panoš musejon peruštamiseh.