Karjalan Rahvahan Liitto vuuvven 2020 oraškuušta alkuan tämän vuuvven oraškuuh šuateh ošallistu kolmen projektin toteuttamiseh: “Yhtes myö olemmo vägi”, “Puhuo yhteh hiileh” ta “Karelija v fokuse”. Niijen toteuttamiseh oli käytetty noin 1,5 miljonua rupl’ua. Projektit ošallissuttih kilpailuih ta šuatih korkiet arvošanat.
– Projektien tehtävinä oli opaštua kylärahvašta peruštamah alovehellisie yhteiskunnallisie ičehallitukšie omissa kylissä ta kirjuttamah projektija, järještyä Oma Pajo -kuoron esityšmatkoja Karjalan eri kylih, valmistua laulukokomuš, kumpaseh oli kerätty 25 lauluo karjalan kielellä, painua Šuuren Voiton 75-vuotispäivällä omissettuja musiikkikorttija, kuvata filmijä Karjalan kylistä ta muita, kerto Karjalan Rahvahan Liiton johtaja Aleksandr Jeremejev.
Aleksandr Vasiljevič niise toivou, jotta liittolaisilla on äijän uušie ajatukšie ta idejoja ta jotta jäještöššä tulou lisyä projektija.
Projektin toteuttamisen lisäkši KRL:n jäšenet aktiivisešti ošallissutah erilaisien toimenpitojen järještämiseh ta pitämiseh, pietäh karjalan kielen kurššija, ratkaissah karjalaisien nykytärkeitä proplemoja.
Liitolla on ošaštoja Karjalan eri piirilöissä, ne liityttih kokoukšeh ZOOM-ohjelman kautti ta kerrottih omien järještöjen ruavošta ta šuunnitelmista.
– Hyvällä mielin olemma, kun tänä vuotena Uuvven Vilgan karjalan kielen klubi “Ildukečoi” liitty Karjalan Rahvahan Liittoh. Tämän ošašton johtaja on Tatjana Kirilkina, lisäsi Aleksandr Jeremejev.
Aleksandr Jeremejev jatkau toimintua Karjalan Rahvahan Liiton johtajana ta šuunnitelmissa on aktiivisešti ošallistuo Karjalaisien runojen vuuvven toimenpitoloih, kirjuttua ta toteuttua uušie projektija ta šamoin kuin ainaki ruatua karjalaisien hyväkši.