Kantakanšojen kielien vuosikymmen: enšimmäiset tulokšet ta šuunnitelmat
Karjalan kanšallisen ta alovehellisen politiikan ministerijöššä piettih issunto, kumpasen aikana paistih Kantakanšojen kielien vuosikymmenen enšimmäisen vuuvven tulokšista ta šuunnitelmista enši vuuvvekši.
Issuntoh ošallistu Karjalan piämiehen šijähini Igor Korsakov ta Kanšallisen ta alovehellisen politiikan ministeri Sergei Kisel’ov, šekä kanšalaisjärještöjen etuštajat, tieto- ta viessintäalan spesialistit.
Issunnon ohjelmašša oli kolme esityštä. Kanšallisen ta alovehellisen politiikan ministerijön ošašton johtajan šijahini Jevgenija Šustova kerto mitä ministerijön puolelta oli luajittu, mimmosie tilaisukšie šuatih jatkuo ta mimmoset oltih järješšetty enšimmäiseh kertah.
— Panen merkillä, jotta šuurempina tilaisukšina, kumpasie ei pietty ennein on EtnoPRO-forumin pitämini, kumpaseh tuli nuorisuo Karjalan eri piirilöistä, šekä karjalan kielen intensiivikuršši, kumpaseh ošallistu 14 opaštajua Karjalan pohjoispiirilöistä ta Petroskoista, šano Jevgenija Šustova.
Karjalan opaššuš- ta urheiluministerin enšimmäini šijahini Žanna Petrova šano, mimmoset oppikirjat oli julkaistu, ta kumpasien käsikirjutukšet vuotetah julkaisomista. Karjalan ta vepšän kielen oppikirjojen lisäkši valmissetah Karjalan kirjailijien tevokšien oppikirja ta metodini kirja muamon kielien opaštajilla.
Kulttuuriministerin šijahini Varvara Lebedeva šaneli Kanšallisen teatterin, Kanšallisen musejon ta Kanšallisen kirjašton šekä Kanšantaijon keškukšen viime vuuvven toiminnan tulokšista.
Esitykšien jälkeh issunnon ošanottajilla šynty äijän kyšymykšie ta ehotukšie. Šuurempana proplemana oli koroššettu muamonkielen oppituntien miärän vähentämini ta alan spesialistien puuteh. Näijen kyšymykšien keškušteluh oli piätetty keräytyö vielä kerran.
