Kalevalan piirin musiikkikoulun johtaja Nina Viljevna Saburova šai Karjalan tašavallan anšijoittunut kulttuuriruataja -arvonimen. Še oli hyväkšytty Karjalan piämiehen käšyllä monivuotisešta ahkerašta ruavošta, korkiešta ammattitaijošta ta kulttuurikehitykšen tulokšista ta še on korkein Karjalan tašavallan kulttuuriruatajien palkinto. Karjalan kulttuuriministeri Aleksei Lesonen myönti palkinnon Kalevalašša.
Nina Viljevna on aktiivini kulttuurivaikuttaja. Karjalašša ta Venäjällä pietäh äijän erilaisie taitokilpailuja ta luovie toimenpitoja. Nina Viljevna šeuruau niitä ta mahollisukšien mukah lähettäy oppilahie ta opaštajie oššallistumah.
— Meijän opaštujat, opaštajat ta koko koulu opaššušlaitokšena aina ošallistuu kilpailuissa. Kakši kertua myö voittima raha-apuo piäštyän kyläšeutujen parahakši kultturilaitokšekši, rahalla oli ošettu šoittimet Borovoin kouluh. Meijän opaštujat šuahah korkiet tulokšet, ošallissutah monih festivaliloih ta kilpailuih ta tuuvvah niistä palkintoja, diplomija ta lahjoja. Opaštajatki mäneššykšellisešti esiinnytäh kilpailuissa tahi konferenššiloissa, kertou koulun johtaja Nina Saburova.
Koulun työkollektiivilla on äijän šuunnitelmie tulovaisuoh: ošallistumini festivaliloih ta kilpailuih, seminariloih ta konferenššiloh, esitykšie paikallisissa tilaisukšissa ta konserttiloissa.
Luovie mahollisukšie ois vielä enemmän, još koulušša ajoissa uuvvissettais šoittimie. Še on loittopiirin laitokšen johtajan šuurin unelma.
Nina Viljevna on ruatan musiikkikoulušša vuuvvešta 1987, heti musiikkiopiston lopetettuo hiän myöšty kotipas’olkan kouluh opaštajakši. Vuotena 2003 opaššušlaitoš šai eriksen juridisen statussan ta Nina Saburova oli hyväkšytty johtajan virkah. Vuotena 2009 Kalevalan musiikkikoulušta tuli piirin opaššušlaitoš, šentäh kun šiih oli liitytty Borovoi-pos’olkan musiikkikoulu.