Joka ruato alkau tiijošta
Enšimmäini vaštautumini etnoalan ruatajien kera tapahtu Petroskoissa ta Priäžäššä.
Luventojen lisäkši oli vierailuretkijä Priäžän järještöih, kumpasissa ihmiset voijah šuaha etnotietuo ta sosialista kannatušta, šemmoset ollah Lastu-keškuš, Elämä-etnokulttuurikeškuš ta Art-selo -luova tila.
— Seminarin ošanottajat ečittih vaštaukšie kyšymykših, mitä pitäy välttämättömäšti tietyä kantakanšoista, konša alotat ta jatat ruatuo etnokulttuurialalla, mitein järještyä ta šuunnitella etnokeškukšien toimintua ta kehittyä šen mahollisukšie, kuin kertuo omašta paikašta ta ruavošta internetissä, šelitettih seminarin järještäjät ECHO-liiton spesialistit.
Priäžän Lastu-keškuš oli järješšetty monilapšisien tuattojen ta heijän lapšien kannatušta varoin. Šielä pojat ta miehet käsin luajitah kaikenmoisie puuvehkehie. Keškukšen järještäjä Leonid Jakovlev korošti, jotta tuntija lapšie varoin tiälä pietäh makšutta, anna vain hyö tullah, a šuurempana proplemana on rahotukšen ečintä toiminnan kannatušta ta jatkuo varoin.
Elämä-etnokeškukšen ruataja Tatjana Seppänen piti opašretkie keškukšen näyttelyjä myöten, näytti mitein ne on järješšetty, kerto mitä ihmiset ruatah keškukšešša, mimmosissa projektiloissa ta mitein keškuš niih ošallistuu.
Šuovatan iltapitoja ta pyhäpäivän huomenešohjelmua vietettih Art-selo -paikašša. Šielä on kaikki, mitä tarviččou, jotta viettyä toimenpitoja lapšie ta aikuhisie varoin. Šamoin šielä voipi jiähä muutomakši päiväkši – on makuuhuonehie ta keittijö.
Paikan johtaja Jekaterina Jefremova kerto keškukšen šyntymiseštä kaikkine vaikeukšineh ta iloine hetkilöineh. Oman ruavon esimerkkinä hiän tovistau, jotta kaikki on mahollista ta joka ajatukšen toteuttamiseh šuau löytyä käytännöllisie keinoja.
Seminarin ošallistujat lähettih omih kotiloih täyšinä uušie tietoja ta ajatukšie. Joka šuurempi tai pienempi ruato alkau juuri tiijošta. Seminarin ošanottajat nyt tiijetäh äijyä enemmän mitein käyttyä näitä tietoja toiminnaššah.
Tällä netälillä seminarija pietäh Murmanskin alovehen Luujärveššä 12.–13. šajekuuta ta Koštamukšešša 15.–16. šajekuuta. Kirjuttautuo voit ECHO-liiton šähköpoštin kautti. Seminarija pietäh Merkitykšien ta tietojen šäilyttäjät- ta Interaktiivini kotišeutututkimuš -projektien rajoissa.
