Tämän vuuvven kešällä Mujejärven piirin Haukkašuaren kyläššä pietäh tietehellis-käytännöllistä kouluo. Nyt leirin järještäjät kerätäh kouluh ošallistujie.
– Ošanottajien joukošša voipi olla alan opaštujie ta piäštökkähie, Venäjän kanšojen rakentamisen perintehie ta niijen šäilyttämiskeinoja tutkijie spesialistija, istorijašta ta alovehen kehitykšeštä kiinnoštunuita ihmisie ta kaikkie, ket tahotah šuaha volont’orin kokemušta kulttuuriresurssien tutkimuš- ta šäilyttämisas’s’oissa, šelitettih Haukkašuaren perintö -projektin järještäjät.
Leirin aikana pannah toimimah kylän piänähtävyttä – vuuvven 1886 melliččyä, Pottojevin aitašša pietäh šäilytyštöitä, ruvetah uuvveštah rakentamah Kuropatkinin riihie šen istorijallisella paikalla, jatetah arheologista tutkimušta Haukkašuarella, pietäh perintehellisien karjalaisien käsitöijen kerhoja.
Kešäkoulun opaššušohjelmua pietäh arhitektorit, restaurattorit, kanšantutkijat. Projektin aikana ruvetah kuvuamah videoita ta ohjelman jälkeh niitä julkaissah internetissä.
Lisyä tietuo voit lukie Haukkašuaren kylän VK-ryhmäššä.