Georgii Kert – 100: muisselmie tutkijašta kuulu Karjalan tietokeškukšešša
Tuiskukuun 1. päivänä filologijan tietojen tohtorin, šuomelais-ugrilaisien kielien, erityisešti šaamelaisen kielen tutkijan Georgii Kertin šyntymäštä täytti 100 vuotta. Karjalan tietokeškukšešša merkkipäivällä omissettih tietoneuvošto.
Georgii Martinovič Kert šynty 1. tuiskukuuta vuotena 1923. 100-vuotispäivänä hänen kollegat, opaštujat, šukulaiset, tuttavat ta yštävät muisseltih tutkijua, kerrottih elämän tapahukšista, näytettih valokuvie, esitettih tietoja arhiivoista.
— Monet valokuvat, kumpasie myö esitämmä nyt teilä, myö näytämmä enšimmäistä kertua. Georgii Kert oli Bubrihin opaštujana, hänellä onnistui, šentäh kun hiän opaštu šuuriloista opaštajista. Šemmoni hyvä koulu merkičči hänen oman tietotoiminnan šekä koko kielitutkimisen tietoošašton mäneššyštä, šano filologijan tietojen tohtori, professori Irma Ivanovna Mullonen.
Monet kielitutkimukšen ošašton nykyset šuavutukšet šuatih alkuo Georgii Kertin tietotoiminnašta. Professori kuoli vuotena 2009, tietoja tutkijan ruavošta ta elämäštä nyt šälytetäh ta tutkitah arhiivoissa. Šukulaiset ta tuttavat vieläki tuuvvah asiepaperija ta valokuvie.
Tietomiehen omahiset niise esiinnyttih muistotilaisuošša, hyö kerrottih perehjuttuja, muisseltih Kertin šuutkoja, šaneltih omista muisselmista Georgii Martinovičista.
Tietoneuvoštošša oli esitetty Kertin muissokši luajittu nettišivu. Tietoja tunnetun tutkijan matoista, šielä kerättyjä materialija, hänen valokuvie ta muisselmie ollah yheššä paikašša. Šen luatija F’odor Gerasimov šano nettišivuo “ikkunakši tutkijan elämäh.”
Tietoneuvošto piettih konferenššisalissa, šieläki toimi hänen julkaisujen, kirjojen ta šanakirjojen näyttely. Tutkija kirjutti šuomelais-ugrilaisista kielistä, šaamelaisešta kieleštä ta paikannimilöistä, valmisti šanakirjoja.
Toimenpivošša jokahini voipi kertuo ta muissella professorie, opaštajua, tietojohtajua, tietoalan toverie.
