Aleksandr Petrovets jo ammuin tahto tulla Karjalah. Hänen matka kešti viisi päivyä ta šen aikana hiän tutuštu Petroskoih ta kaupunkin mukavih paikoih, karjalaisih kylih Korzah ta Kinnermäh ta niijen eläjih, karjalaisih šyömisih ta perintehih, opaštu tanššimah karjalaisie tanššija, paistamah šul’ččinoja ta tervehtimäh karjalakši.
— Tavallisešti mie en tutki paikkua, kunne ajan. Matka tulou tutkimisekši miula ta šiitä mie ni kerron videošša. Karjalašša mie en nähnyn šuosittuja matkailupaikkoja, ka matka oli oikein mukava. Miula onnissuttu, jotta miula oltih hyvät apulaiset, kumpaset autettih valmistua ohjelmua, kerto Aleksandr Petrovets.
Karjalaiset perintehet ta kieli šynty bloggerin kiinnoššušta, hiän iče kuuluu vähälukusih kanšoih ta ymmärtäy kanšojen kielien ta kulttuurien tilannehta Venäjällä.
Aleksandr kuvasi kymmenen filmie Venäjän eri paikoista. Hänen blogissa youtube-kanavalla on yli 50 tuhatta šeuruajua. Aleksandr kuvuau matkailukohtie, šekä näyttäy tavallista elämyä Venäjän alovehilla. Matkan johtajana oli Insait ihmiset -bloggerikeškukšen tuottaja Aljona Rizanova. Keškuš auttau paikallisie bloggerija kehittyä omie šivuja verkošša.