Vuuvven tulokšet: Vladimir Putin piti perintehellisen lehistötilaisuon
Tänäpiänä 14. talvikuuta Venäjän presidentti Vladimir Putin piti perintehellisen lehistötilaisuon, missä kerto vuuvven tulokšista. Tapahtuma piettiin lähimuuvvošša Moskovašša. Mukana oli yli 500 toimittajua venäläisistä ta ulkomaisista joukkotiijotušvälinehistä.
Yli nellä tuntie keštänyön šuoran lähetykšen aikana Venäjän presidentti vaštasi 67 kyšymykšeh. Kyšymykšet košettih esimerkiksi erikoista šotaoperatijuo Ukrainašša, Venäjän kehityštä ta muan ulko- ta šisäpolitiikkua. Presidentti kerto niise taloušaseista.
— Arvijojen mukah vuuvven loppuh šuaten Venäjän bruttokanšantuoteh kašvau 3,5 prosenttie. Tämä on hyvä tuloš, Putin korošti.
Presidentin mukah infl’atijo Venäjällä on kuitenki kašvan.
— Vuuvven loppuh šuaten infl’atijo vuotetah olijan noin 7,5 prosenttie tai hieman enemmän ili 8 prosenttie, Putin šano.
Venäläisien elinajan šuunnitelma on 74 vuotta.
— Vuotena 2021 elinajan šuunnitelma Venäjällä oli 70,06, vuotena 2022 še oli 72,73 ta tänä vuotena še voit olla 74 vuotta, Putin kerto.
Tällä kertua lehistötilaisuon ominaisuona oli še, jotta toimittajien kyšymykšien lisäkši presidentti vaštasi Venäjän eläjien kyšymyksih, kumpasie eri viessintäkanavien kautta oli tullun yli kakši miljonie.
Tilaisuon järještäjät koroššetah, jotta kaikki presidentillä lähetetyt kyšymykšet šuahah vaštaukšie. Näin šentäh, jotta perintehellistä Putinin Šuorua linjua ei tänä vuotena järješšetä.
Aihiešta voit lukie niise šuomekši ta vepšäkši.
