Täl vodel Pohjoižen, Sibirin da Edahaižen Päivnouzman igähižiden vähäluguižiden rahvahiden associacii praznuičeb 30-vottušt jubilejad. Necikš päiväks ühtenzoituz vaumiči igähižiden vähäluguižiden rahvahiden suren foruman, mitte mäni Moskovas.
23.-28. sügüz’kud forumale kerazihe igähižiden rahvahiden ezitajad äjiš Venäman regionoišpäi. Foruman adivoiden keskes oliba vepsläižed-ki. Gleb Fomin Petroskoišpäi eziti vepsän rahvast associacian Norišton nevondištos.
– Täl vodel minä ühtnen forumaha da Norišton nevondišton radho ezmäižen kerdan. Nece om sur’ mahtišt minun täht. Meletan, miše mö üthes tegem völ äi tätktoid azjoid meiden rahvahiden hüvüdeks, sanui Gleb Fomin.
Foruman aigan mugažo mäni XV ”Pohjoižen kal'huded”-rahvazkeskeine ozuteluz-jarmark, kus pohjoižen rahvahad ozutiba ičeze kul’turad, čomitesid, rahvahaližid sädoid.