Karjalas läksi eloho ”Vepsläižiden vändod”-kirj. Sihe mülüb 25 vändod sändoidenke. Keraziba necen kirjan GTRK ”Karelian” radnik Jelizaveta Makarova da Petroskoin universitetan vepsän kelen opendai, vepsän fol’kloran oppii Ol’ga Žukova.
Jelizaveta tartui vepsläižiden vändoiden keradamižehe völ opetes universitetas. Hän openzi sigä vepsän kel’t i kirjuti diplomtöd vepsläižiš vändoiš. Opendusen jäl’ghe sündui idei tehta mugoine kirj, siks ku nece tem om oppidud vähän.
– Raha-abun kirjan tegemižele sain ”Росмолодёжь”-grantoiden konkursal. Mö naprim kerata ühthe kirjaha kaik, mi tedištin vepsläižiden vändoiš. Vepsläižed vändod ei ole oppidud ni etnografijan, ni fol’kloristikan polespäi. Edel necidä ei olend erišt kogomust, kuna ned oliži keratud. Om vaiše erasid johtutesid erazvuiččiš paginoiden ozutesiden kirjoiš. Minä kerazin materialad vändoiš Toižeges, Kalages. Ol’ga Žukova erasiš vändoiš tedab ičeze babalpäi, jagoi niil minunke, sanub Jelizaveta Makarova.
”Vepsläižiden vändod”-kirj linneb oigetud Karjalan, Piterin da Vologdan agjoiden kul’turpertihe, kirjištoihe, školihe da lapsiden kodihe, kus opetas vepsän kel’t da kul’turad.