Ozuteluz: Vepsän man unohtamatomad sijad
Šoutjärven vepsläižes etnografižes muzejas avaitihe taideh-literaturine ozuteluz ”Vepsän man unohtamatomad sijad” («Творческие берега»). Sil om ezitadud kuvad, miččihe om pandud rived vepsläižiden runoilijoiden runoišpäi vai prozaspäi.
Taidenpirdajiden keskes oma Boris Prokazov, Anatolii Ščerbakov, Viktor Lonin, Konstantin Moškin, Alina Lesonen, Vladimir Melentjev. Mugažo ozutelusel voib nähta Ilja Timinan, Julia Jutiševan, Anastasija Volkovan fotokuvid, lapsiden pirdatusid da erazvuiččid käzil tehtud tehmusid.
— Vepsläižed elätaze čomiš sijoiš – därviden vai d’ogiden randoidme. Necida čomut nähtaze ristitud-ki, kudambad tuldaze mijale. Kaikutte ristit näggob čomut ičeze sil’mil i däl’ges ken-se ozutab sidä bumagal, ken-se – sanal. Sikš mö tahtoim ozutada meiden röunan čomid sijoid kaikile, ken tulob tänna muzejaha, sanub muzejan pämez’ Natalja Anhimova.
Ozutelusen avaidusel päadivoin oliba Vepsän rahvahan hor da külän eläjad. ”Vepsän man unohtamatomad sijad”-ozuteluz radaškandeb muzejas necen voden redukun lophusai.
