Luvemma “Kalevalan” runoja yheššä
Luvemma “Kalevalan” runoja -kilpailuo järještäy Petroskoin valtijonyliopisto. Šiih kučutah ošallistumah Karjalan tašavallan, Udmurtijan, Komin, Mordovijan šekä Tverin alovehen eläjie.
— Kilpailuh voipi ošallistuo yli 12-vuotiset ihmiset. Arvoštelijat valitah parahat lukijat kolmešša ikäryhmäššä. Hyö kiinitetäh huomijuo šiih, kuin hyvä iäntämini on ta kuin ilmekkähäšti ta nerokkahašti kilpailija lukou, yliopiston lehistöpalvelu kirjuttau.
Hakemukšet otetah vaštah tuiskukuun 1. – 14. päivinä Petroskoin valtijonyliopiston kirjašton šähköpoštiošoittehella.
Kilpailun voittajat ilmoitetah Kalevalan päivänä – 28. tuiskukuuta.
Vuotena 2022 Karjalan Periodika-kuštantamo julkaisi Uuvven Kalevalan vepšäkši ta venäjäkši. Vepšänkiännökšen teki kielentutkija ta runoilija Nina Zaitseva. Kirjan ilmeštymini on vepšän kulttuurivuuvven yksi tärkeimmistä tapahtumista.
Elias Lönnrotin keryämä ta toimittama Kalevala-runoelma on kiännetty yli 60 kielellä. Enšimmäini painoš ilmešty vuotena 1835. Vuotena 1849 valmissetulla “Kalevalan” täyvellisellä painokšella tänä vuotena täyttäy 175 vuotta.
Aihiešta voit lukie niise šuomekši, vepšäkši ta venäjäkši.
