Šajekuun 11. päivänä uuvvissetun joutoajan talon avajaisih keräyty rahvašta Kuuširannašta ta nuapurikylistä. Vanhašša rakennukšešša olijien kirjašton ta musejon tilojen korjuamini on monien järještöjen, ihmisien, laitokšien toiminnan tuloš.
– Rakennuš šeiso tyhjänä 10 vuotta. Meijän yhteiskunnallisen järještön toteuttamien projektien, Tolvojan kylähallinnon, paikallisien eläjien avulla meilä onnistu korjata ta avata še. Joutoajan talo on esimerkki, još myö yheššä mitänih haluomma, myö voimma löytyä keino luatie še, kerto Onegan niemen pirtti -yhteiskunnallisen järješton johtaja Natalja Vil’k.
Kuuširannan joutoajan talon väriksi valittih ruškie. Še on kirkaš ta muissuttau kyläläisillä ta kylän vierahilla, jotta kaikki on mahollista luatie omin voimin.
Talon korjuamini on enšimmäini Kuuširannan turismimahollisukšien kehittämisprojektin aškel. Toisena on folklori-, kanšanruno- , kirjallisuštutkimuš-, tietokirjojen keryämini, ruato paikallisien eläjien kera, jotta hyö oltais valmehie ottua vaštah kylän vierahie.
Kuuširanta on merkittävä paikka Karjalašša. Še on tunnetun starinankertojan Irina Fedosovan kotimua. Neičyt talonpojan pereheštä oli luonnoltah taitaja. Oneganniemimualla muisto häneštä šäilyy.
Kuuširannan joutoajan talo tulou yhekši uuvven matkailuohjelman paikoista Onegan niemimuata myöten.