Konkurs Periodikan jubilejaks: luge ičeiž armaz runo
Täl vodel ”Periodika”-paindišt praznuičeb ičeze jubilejad. Sile täudub 30 vot. Siš aigas om pästtud eloho äi kirjoid, miččid ristitud navediba da lugeba. Ičeze jubilejaks paindišton radnikad tegeba videoiden konkursad, miččen nimi om “Lugen minun runoilijad”.
—Konkursan päsänd om se, miše ühtnikoile pidab lugeda runod kirjaspäi, mitte om paindud “Periodika”-paindistos. Konkursas om nel’l’ nominacijad: runo vepsän kelel, runo karjalan kelel, runo venän kelel da runo suomen kelel, sanub Alina Kartinen, Karjalaižiden, suomalaižiden da vepsläižiden mediakeskusen radnik.
Videod voib panda Vkontakte- vai Instagram-socialižihe verkoihe, kirjutada hešteg #читаюмоегопоэта. Mugažo pidab oigeta rolikan verkpočtale, miše konkursan tegijad homaičeba videod. Tehta necidä voib 9. päivähäsai heinkud 2021.
Kaik ližatedod oma täs.
