Karjalas nelländen kerdan mäneb vepsän kelen nedal’
13.—19. sulakud Karjalan erazvuiččiš agjoiš mäneba vepsän kelen da kul’turan kaičendaha oigetud azjtegod. Päazjtegoid tehtas Karjalan pälidnas, Petroskoiš.
Vepsän kelen nedalin pätegendan om kingitada homaičust vepsän rahvahaze, sen veroiden da tradicijoiden kaičendaha. Mugoine akcii abutab popul’arizoitta necen vähäluguižen rahvahan kel’t da kul’turad. Akcijaha ühtneba Segežan, Belomorskan, Kondopogan kirjištod, Šoutjärven muzei, Petroskoiš – Karjalan rahvahaline teatr, Karjalan Kelen, literaturan da istorijan institut, Karjalan Opendusen kehitoitusen institut, Petroskoin konservatorii, Petroskoin universitetan baltianmeren suomalaižen filologijan kafedr, ”Periodika”-paindišt.
— Mö ühtesradnikoidenke vedäm urokan Suomalaiž-ugrilaižen školan klassoiš, kus lapsed opendaba vepsän kel’t. Tegem mastar’-klassan vepsän kelel da vändam vähäižen lapsidenke. Kaikuččen voden ühtnem neche čomaha akcijaha, sanub ”Kipinä”-kulehtesen pätoimitai Jana Filimonkova.
Vepsän kelen nedalin aigan mugažo Petroskoiš mäneb ”Vepsläine neižne” (”Вепсянка”)-monospektakl’an ezmäine ozutez. Monospektakl’an vändab Karjalan arvostadud artist Aleksandra Aniskina.
Uzištoid neciš temas voib lugeda mugažo venäks.
