Kilvan pidi Karjalan Kanzallizen da alovehellizen poliitiekan ministerstvu. Kilbah tuli 43 ilmoitustu. Voittajikse kolmes nominatsies piäzi 14 projektua.
Karjal on sovun aloveh -nominatsies voitti viizi projektua, kudualoin todevuttamizeh annetah 1 924 706,90 rubl’ua. Voittajien joukos on Karjalan rahvahien ystävys-liiton Karjalan kanzalline moudu: nygyaigaine paginoin stiili -projektu da Karjalan etnodobrovol’tsat -projektu, kuduadu rubieu todevuttamah Kuožali -yhteiskunnalline liitto.
Meijän ezi-ižien mua -nominatsies voitti viizi projektua, kudualoih annettih 2 175 314,70 rubl’ua. Voittajien joukos ongi Anuksen karjalazet -liiton Armas kieli -projektu, kudai on omistettu karjalazen runoilijan Vladimir Brendojeval 90-vuozipäiväle.
– Himoittas, ku Brendojevan runoloi da niilöih kirjutettuloi pajoloi kuultas Karjalan eri čuppulois. Projektan aigua piemmö vastavuksii Anukses da Anuksen piirin kylis: Sammatuksel, Kuujärvel da tozis kohtis, sanommo, Sordavalas. Sen ližäkse Kuujärves kačotah azettua kaksikielizet pihalavvat Školan pihah da školan pertilöin uksih, saneli Anuksen karjalazet -liiton piälimäine Vladimir Lukin.
Projektat, kuduat todevutetah Karjalan yhtel libo kahtel munitsipualizel alovehel -nominatsies vallittih nelli projektua da niilöih annettah 899 978,40 rubl’ua. Voittajien keskes ollah Arhippa Perttuzen fondan Yhteinen Viena -projektu da Nevond- nuorižon keskuksen Kaik uhtes! -entolaboratourii -projektu.