Ozutelusel kaikuččen voden Pohjoižen, Sibirin da Edahan Päivnouzman igähižed rahvahad voiba ozutada ičeze radonmahtod, käzitöd da kul’turad. Sur’ jarmark mäni Moskvan Sokol’niki-parkas.
Karjalan rahvahad mugažo ühtneba necile ozutelusele joga voden. Täl kerdal Karjalan delegacijaha mülüiba Radomahtoiden keskuz, Šoutjärven muzei da Periodika-paindišt. Vepsläižid mugažo eziti Podporožjen agjan Vidlan Vepsläine fol’klorkeskuz. Periodika-paindišton ozuteluzpaličal oli ezitadud kirjad, miččed om paindud Periodika-paindištos suomen, karjalan da venän kelil.
— Om čoma, miše mugoine sur’ ristituiden lugumär kaikuččel Venämalpäi voiba tundištadas meiden Karjalan rahvahidenke da Periodika-paindišton radonke, ved’ nece om üksjäine paindišt, kus paindas kirjad da lehtesed Karjalan rahvahiden kelil. Ozutelusen adivoil oli voimuz’ tundištadas painusidenke da ossta ned, - sanub Kodima-lehtesen toimitai Darja Švecova.
Luge ližad Kodima-lehtesen redukun nomeras.