Hüvä lahj Kvarcitnii-posadan lapsile
Todesižen praznikan lapsiden täht tehtihe Kvarcitnii-posadas. Lahjaks lapsile tuliba uz' tandreh, kus voib väta da kävelta da sen ližaks tehut velokezroiden täht. Tehta vändsijan lapsile jo amu toivoiba sijaližed eläjad. Posadas om äi lapsid, i mugoine sija oli todeks tarbhaine.
– Lähen oma lapsiden päivkodi da augotižškol. Minä elän tägä i nägen, miše tämbei lapsed kaiken aigan oma necil sijal. Nügüd' tägä eskai erased urokad tehtas. Minä olen ihastusiš, miše nügüd' meiden lapsed voiba ajelta velokezroil da rolikoil varuta, sanub Šokš-külän pämez' Viktoria Butorina.
Lapsiden tandreh om tehtud Sijaližiden iniciativoiden tugen programman mödhe. Projektan arv om 1 300 000 rubläd. 900 000 rubläd om anttud valdkundan büdžetaspäi. Toižed rahad om makstud sijaližes büdžetaspäi, mugažo suren ližan oli juridižiden mehiden rahad. Hüvän raha-abun anttihe mugažo sijaližed eläjäd. Posadan pämehen sanoiden mödhe, küläs oma völ erzvuiččed problemad. Ozutesikš, jo amu pidab tehta drenaž-sisteman. Nece radom läheližiš planoiš da voib olda, se linneb tehtud mugažo sijaližiden iniciativoiden tugen programman abul.
