Uuši “Taival” on jo viiještoista. Enšimmäini almanakka näki päivänvalon vuotena 2006 ta šiitä ajašta karjalankielisen kirjallisuon taival pitkeni ta leveni. “Taipalen” jokahisen kirjuttajan huolena on karjalan kieli ta karjalaini kulttuuri, niijen tulovaisuš.
— Vuosi 2023 on ilmotettu Opaštajan ta juohattajan vuuvvekši. Tällä teemalla on omissettu Matti Pirhosen kirjutuš “Šemmoni oli meijän taival opaštajan ammattih”. Karjalan anšijoitunut opaštaja Matti Pirhonen tänä vuotena ois täyttän 115 vuotta. Omašta šuomen kielen opettajašta kertou Juakko Rugojev kuvaukšeššah “Meijän opaštaja”, kertou Periodika-kuštantamon johtaja, almanakan toimittaja Natalja Sinitskaja.
Karjalan kanšankirjailijalla Juakko Rugojevilla tänä vuotena niise on merkkipäivä — 105 vuotta. Folklorin tutkija Valentina Mironova kirjutukšeššah “Rahvahanrunouven ihailija” kertou Juakko Rugojevista kuin kirjailijašta ta niise kuin folklorin keryäjäštä.
Tutkimušruato-ošašša on mukava lukie opaštaja Svetlana Korobeinikovan materiali perehen muistoesineheštä — neiččyön venčäštä. Šamašša ošašša folkloristi Santra Stepanova šanelou iänelläitkijäštä Paraskovja Saveljevašta, kumpani tänä vuotena ois täyttän 110 vuotta.
Almanakan ainasen kirjuttajan Raisa Remšujevan Tämä viesti on jälkipolvilla -artikkeli on omissettu muamoh Santra Remšujevan elämällä ta muisselmilla, a tietomiehen L’udmila Ivanovan tutkimuš pal’l’aštau karjalaisen kylyn šaloja. Runot-rubrikissa tällä kertua on runoilijan Sergei Jakovlevin viisi runuo ta prousa-ošašša on esitetty Valentina Kondratjevan Kirkasjogi-kertomuš.
Taival-almanakan matkuštamisešta kertojilla šivuilla on tarittu luvettavakši Uljana Tikkasen kuvauš “Kaunistu loitton, kaunistu ihan rinnal” šiitä, kuin voipi löytyä kaunehutta ihan tavallisista paikoista šekä Maikki Spitsinan materiali Vienanmeren kallivopiirrokšista.
— Taivalta korissetah šivut värikkähien valokuvien kera. Niissä lukija näköy Igor’ Georgijevskin kaunehie kallivopiirrokšien valokuvie ta Uljana Tikkasen Šiämjärven kylissä otettuja valokuvie, kumpaset kuvitetah tutkijan Anastasija Afanasjevan artikkelie Šiämjärven paikannimilöistä, šanelou almanakan taittaja Jelena Nikitina.
Aihies voit lugie ven'akse.