Uuvven autobuššiašeman tilat tullah vielä mukavammiksi matkuštajilla, autobuššien kulettajilla ta ašeman ruatajilla.
Karjalan rakentamisen ministeri Viktor Rassipnov ilmotti, jotta korjaušruavot on jo puolekši lopetettu.
– Enšimmäini rakennuš, kumpašešša ruvetah pitämäh tarkaššušta ennein matkua on melkein valmis. Šiinä alettih kunnoštamisruatoja šekä aktiivisešti šuoritetah ruatoja ašeman piärakennukšešša. Kaikin voimin yritämmä lopettua kaikki työt vuuvven loppuh šuaten, korošti Karjalan rakentamisen ministeri.
Projektin mukah uuvvella autobuššiašemalla rakennetah eri rakennukšie. Niissä ruvetah tarkistamah autobuššija ennein reissuja ta niijen jälkeh, šamoin valmissetah eri tila ruatajie varoin šekä uuvvet ašemašillat katon alla.
Ašeman šiämeššä niise tulou muutokšie, še šuurenou. Rakennukšeh lisätäh kakši tilua, yheššä niistä tulou ruokala. Piärakennukšešša järješšetäh muamojen ta lapšien huoneh, liäkärin työhuoneh, korjatah vessat, ašetetah uuvvet kassat ta šäilytyškomerot. Vuotantašalissa niise tulou mukavampi vuottua omua reissuo.
Šamoin jotta uuši autobuššiašema olis entistä parempi, še rupieu vaštuamah kaikkie turvallisušvuatimukšie.