TalviUkon kondu on kuulužimii turizmukohtii Karjalas. Vuvvennu 2019 kondu otti vastah läs 30 tuhattu turistua. Joga vuottu karjalazen pakkasukon – TalviUkon – kondu suurenou, čomenou da kehittyy. TalviUkol on äijy nähtävysty – perdat, haski-ruvun koirat, TalviUkon rezidentsii, Lumikin Dvorču, Saamelazien kylä da muut. Tänävuon konnus rodih Kummalline talvi -troppu, kunne on sijoitannuhes Kalevala-eeposan personuažoi, nostettih lippuloinmyöndykohtu, Lumiukin Dvorčas rodih Armas Karjala -ozuttelu, kuduas meijän tazavallan gost’at voijah tuttavuo Karjalah. Tänäpäi konnus täytty vägie nostetah mašinoinazetuskohtua 500 paikale da valmistetah mägie vatruškoil čurattavakse. Lähiaigua ruvetah uvvistamah Talviukon pertii hänen suures talois – rezedentsies.
– Tänävuon kačommo ottua vastah 30 prosental enämbi rahvastu, migu mulloi. Jo tänäpäi turistoin joukot kirjutetahes meile ekskursieloih. Suurel joukkoloil ekskursieloi pidäy hommata edukädeh, perehii otammo vastah joga päiviä, sanou konnun ruadai Aleksandra Zaharova.
Talviukon konduh laskietah maksottah nellivuodizii dai pienembii lapsii da niistielöi.