Runojen päiväkši valmissettih luventoja, esitykšie ta leikkijä
Karjalaisien runojen vuuvven piätapahtumua – Runojen päivyä pietäh Petroskoissa. Oša tapahtumista on online muuvvošša. Juhlapäivä alkau Marija Kundozerovan luvennošta “Topelius & Timonen: 200 vuotta vaštautumisen jälkeh”. Luventuo pietäh Karjalaisien runojen vuuvven Vkontakte-šivulla kello 10.
Päivällä klo 12 alkau opašretki Petroskoissa. Šen ošanottajat keräyvytäh Elias Lönnrotin puistikošša ta tutuššutah Kalevala-eepossan paikkoih. Šamoin puistikošša kello 14.00 alkau runojen lukijien kilpailu. Karjalan kanšallini kirjašto valmisti luvennon “Karjalan starinankertojat ta runonlaulajat” ta Karjalaisien, vepšäläisien ta šuomelaisien kielien resurssimediakeškuš – interaktiivisen leikin.
Illalla, kello 16.00 avatah lapšien piirrokšien näyttely Kanšallisešša teatterissa, šieläki kello 17.00 pietäh juhlallista konserttie ta šen jälkeh kello 18.30 Spartak-stadionin lähellä olijalla kentällä šuau opaštuo peluamah kyykkyä.
Videoluventoja šuau kaččuo Karjalan kielellä virallini statussi -Vkontakte-ryhmäššä. Ryhmän ohjuajat kučutah niise karjalaisella čäijynjuonnilla Coffee Shop -kahvilah.
Karjalan piirit lisäyvytäh Runojen päivän juhlimiseh. Karjalan kaupunkiloissa ta kylissä šinä päivänä pietäh runoilla omissettuja toimenpitoja.
Lisyä tietoja šuatta Karjalaisien runojen vuuvven Vkontakte-šivulta.
