Heinäkuun 12. päivänä mierolaisen kalenterin mukah on Pyhien Apostolien Petrin ta Puavilan päivä. Kylissä, missä on näijen pyhien kiriköt šitä päivyä pietäh kyläpruasniekkana.
Martsial’nije vodi -parantolašša Pietari Šuuren käšyn mukah oli rakennettu Apostoli Petrun kirikkö ta še šäily nykypäivih šuaten. Pruasniekka perintehellisešti alko malittojen juhlallisešta lukomisešta kirikön piäoprasan ieššä. Šen jälkeh alko huvitušohjelma.
– Myö elvytämmä perintehie. Vierahat šuatih nähä teatteriesitykšie, mitein Pietari Šuuri vieraili parantolašša ta mitein ruataja Iivana Rebojev šai čuarin lahjoja. Tuntie Pietarin ajan ilmapiirie autettih istorijallisen rekonstruoinnin klubi “Gardemarin” Kontupohjašta ta Rebojevin roolissa olija F’odor Kuz’min, kerto musejon ošašton johtaja ta Pietarin roolin esittäjä Oleg Mošnikov.
Pietari Šuuri Martsial’nije vodi -paikan vierahien kera kävi vesihettien ohičči kertuon kaikenmoisie juttuja imperattorin elämäštä ta levošta vesiparantolašša. Lopušša oli pietty opašretki Musejokaččojan talošša.