Tuiskukuun 14.—15. päivinä Karjalan tašavallan kanšallisešša kirjaštošša pietäh XVIII Kotišeutuoppiluvennot -tietokonferenššie. Tilaisuon aihiena on “Kotišeutuoppi ta istorijallini muisto: šukupolvien välini yhteyš”.
Konferenšših ošallistuu tietoruatajie, opaštajie, arhiivojen ta kirjaštojen spesialistija šekä nuorie tutkijie, opaššušlaitokšien studenttija ta aspiranttija Karjalašta, Venäjän toisilta alovehilta ta Valko-Venäjältä.
— Meijän konferenšši on monipuolisilla ihmisillä, ket voijah esittyä omien monivuotisien tutkimukšien tulokšie. Viime vuotena Karjalan tašavallan kanšallini kirjašto vietti 190-vuotisjuhlua, ta konfrenšissa toimi Kirjaštokotišeutuoppi -sektijo. Šiih ošallistu šeloštajie Karjalašta, Minskistä, toisista kaupunkiloista. Tänä vuotena uuvveštah kuččuma kollegoja Venäjän toisilta alovehilta ta Valko-Venäjältä, kerto avajaisissa kanšallisen ta kotišeutuopillisen kirjallisuon ta bibliografijan johtaja Aleksandr Larionov.
Konferenššin ohjelma on luajittu ottuan huomijoh kulujan vuuvven tärkeitä muistopäivie.
— Petroskoin Gusarovilla nimitetyn kaupunkin keškuškirjašton ruatajat kerrotah Dmitrii Jalovlevičista. Tänä vuotena vietetäh kirjailijan 100-vuotisjuhlua. Šamoin šeloštajat kerrotah Aunukšen gubernijašta. Vuotena 2024 pietäh šen 240-vuotisjuhlua. Venäjän tietoakatemijan Karjalan tietokeškukšen Kielen, kirjallisuon ta istorijan instituutin spesialistit kerrotah meilä huomattavašta tietomieheštä Nikolai Bogdanovista, šano Aleksandr Larionov.
Konferenššin ošallistujat käsitelläh istorijallisen muisson tutkimisen kyšymykšie, kiännytäh ihmisien muisselmien ta männeisyön luovan tajuomisen puoleh.
Linkkijä konferenššin šuorah lähetykšeh voipi löytyä tilaisuon ohjelmašta.