“Periodikan” julgavot ei piästä ilmah
Periodika-julguamo keskustau omien kanzalliskielizien julgavoloin julguamizen ligakuun 24. päiväs algajen finansuvaroin hädiä. Sih nähte on virrallizesti annettu tiediä kanzalliskielizien joukkoviestimien perustajile: Karjalan Tazavallan halličuksele, Karjalan Tazavallan zakonoinhyväksyndykerähmöle, Opastus -da sportuministerstvale, Kanzallizen da alovehellizen poliitiekan ministerstvale, Karjalan Rahvahan Liitole, myös Karjalan Tazavallan Roskomnadzoran haldivole.
— “Periodika” on puuttunuh aiga pahah tilandeheh. Tiluajat jo maksettih lehtilöis da žurnualois, ga niilöi ei tule, ruvetannehgo hyö tuliel aijal tiluamah karjalan-, vepsän- da suomenkielizii julgavoloi kerran moizeh bekettih puuttuhuu… Sidä paiči voimmo kaimata meijän alallizii nerokkahii ruadajii, kielentiedäjii, hyö lähtietäh ruadamah toizih kohtih, kus on enämbi varmuttu tulies aijas da kus on suurembi palku. “Periodikan” ruadajien joukko on kehitynnyh moizekse, mittuine se on tänäpäi, vuozikymmenii. Karjalan, vepsän da suomen kielen tiedäjis tänäpäi on hädä. Sen ližäkse kanzalliskielizien julgavoloin ilmah piästämizen keskevytändy nostau pahoi mielii kanzallizes ymbäristös, sanou Periodika-julguamon johtai Natalja Sinitskaja.
Aihies voit lugie vepsän, suomen da ven'an kielel.
