Periodika-julguamo jo nelländeh kerdah pidi karjalan, vepsän da suomen kielen tiedäjien kilvan “Myö olemmo Karjal” Muamankielen päivän kunnivokse.
Kilbah sai yhtyö kahten nedälin aloh tuhukuun 6. päiväs algajen tuhukuun 21. päivässäh. Tänävuon kilbah yhtyi 155 hengie. Kyzymyksih karjalan kieles da kul’tuuras vastai 45 hengie, vepsän kieles da kul’tuuras – 15 hengie da suomen kieles da kul’tuuras – 95 hengie. Omii vägii kilvas opittih školaniekat, opastujat, kielialan ruadajat da kielen suvaiččijat Karjalan eri čuppuloispäi.
– Kilvas oli viizi nominatsiedu. Tavan mugah kilvas oli kymmene kyzymysty karjalazien, vepsäläzien da suomelazien histourieh, etnogruafieh da kul’tuurah nähte, oligi kielioppillistu harjaitustu. Karjalan kielen da kul’tuuran tiedäi -nominatsielois voitettih Tuuksin kylän eläi Valentina Nikolajeva (livvin murreh), kalevalalaine Alevtina Lesonen (vienankarjalan murreh) da petroskoilaine Ol’ga Hramtsova (lyydin murreh), sanoi Oma Mua -lehten piätoimittajan virras toimii Ol’ga Smotrova.
Vepsän kielen da kul’tuuran tiedäi -nominatsies voitti petroskoilaine Irina Popova da Suomen kielen da kul’tuuran tiedäjäkse rodih petroskoilaine Jekaterina Bikova.
Kilvan palkičustseremounii pietäh 9. kevätkuudu 16.00 aigah Karjalazien, veps’läzien da suomelazien resursukielikeskukses adresil Petroskoi, Titovan piha, 3.