Palkindojengat Nuožarven kunnostamizeh
Vuvves 2014 lähtijen Nuožarven kyläkundu yhtyy Paikallizien ehoituksien kannatusprogrammah da Alovehellizien Yhteiskunnallizien Ičehalličuksien (TOSoin) projektoin kilbah. Joga vuottu nuožarveläzien projektat voitetah da suahah jenguabuu. Seiččemes vuvves Nuožarves da lähikylis on todevutettu 12 projektua, kuduat yhtes maksettih 5,3 miljonua rubl’ua. Tämän periä Nuožarven kyläkundu sai tänävuon 560 tuhattu rubl’ua palkinduo tazavallan b’udžietaspäi. Nenne jengat voibi pidiä vaiku oman kyläkunnan kunnostamizeh.
Nuožarveläzet jo tietäh, mih pietäh jengat. Hyö jo valmistettih kaksi menolistua. Enzimäizikse pannah kundoh kul’tuurukoin piha da kohendetah kul’tuurukoin pordahat, tulenduveräi da oččuseiny, kuduas pakutah alah kivet.
Toizekse kohendetah pirsu tulipalomašinoih niškoi. Se on sežo keskel kyliä, juuri kul’tuurukoin vastaspäi. Vienotandukohtu oli azuttu ei muga ammui, ga ei ylen hyvin, pirsu murei, se pidäy vältämätä järgieh kogendua.
Ližäkse kyläkunnan haldivo ostau da azettau seiččei uuttu dioudulampua da vie drl-lampua. Erähät pihalampat palettih, net pidäy vaihtua. Ostosobimus on jo allekirjutettu, terväh Nuožarveh tuvvah uvvet lampat.
– Ku meil jiännöy eluo, toinah jiäygi, ga meidy kyzyttih kohendua tiet kahtes kohtas. Se on pala Školakujuo da pieni palaine dorogua Kiiškoiniemes. Olemmo valmehet pidiä dostalit jengat tielöin remontah. Mollembat ollah kivittämättömät muadorogat, net pidäy tazoittua, paikata havvat. Tälleh vähäzel kunnostua keskukses loitomba olijat kylät, sanou Nuožarven kyläkunnan hallindon johtai L’ubov Ponomar’ova.
