Karjalan piämieš piti online-issunnon, min teemana oli Louhen piirin sosialini ta talouvellini tilanneh. Issunnošša Artur Parfenčikov kerto pohjoisalovehen kehitykšen piäperspektiivilöistä. Šamoin tašavallan piämieš anto konkrettisie tehtävie ministerijöillä ta paikallisilla ičehallinnoilla, jotta ratkaissa kyšymykšie, kumpasie lähetettih Louhen piirin eläjät sosialiverkoissa.
– Louhen piirin kehityštä varoin pitäy jatkua infrastruktuuri- ta sosialiobjektien uuvvistamista šekä uušien elinpaikkojen rakentamista. Še houkuttelou investorija ta antau mahollisuon kehittyä turismie. Tämä kaikki luatiu piirin eläjien elämyä mukavammakši, korošti Artur Parfenčikov issunnošša.
Šamoin Karjalan piämieš kerto, jotta Šuoperä-tien pätkän šiirtämini federaliseh ominaisuoh antau mahollisuon huomattavašti parentua tien kuntua. Nämä työt on šuunniteltu muutomakši vuuvvekši. Artur Parfenčikov šano, jotta on luajittu šopimukšie ni kanšainvälisen Šuoperä-rajanylityšpaikan rekonstruontih, mi niise on tärkietä Karjalan eläjillä.
Vuotena 2022 on šuunniteltu Kola-autotien 1040–1051-kilomertien välisen pätkän remintti. Korjauštöih on miärätty 229 miljonie rupl’ua. Šamoin tänä vuotena meinatah alottua Louhi–Piäjärvi-rautatieyhtevyš.
Šuunnitelmien mukah vuotena 2022 Louhen piirissä aletah luatie Piäjärven puhissušlaittehien projekti ottuan huomijoh kanšallisen puiston lähellä oluo. Šamoin pohjoispiirissä miärätäh paikka, missä ruvetah rakentamah taloja, kunne voijah muuttuo elämäh ihmiset korjuamiskelvottomista taloista. Louhen piirissä meinatah šuorittua korjauštöitä Čuupan koulušša, Louhen pol’ničašša, Malinavuaran felššeripunktissa šekä aletah rakentua uuši ambulanšši Kiestinkissä.