Loma vienankarjalan kielen parissa
Kielileirih otettih ošua Juakko Rugojevilla nimitetyn koulun 2. “в” luokan opaštujat, kumpaset oppituntien ohičči opaššutah karjalan kieltä. Kevätloman aikana koulun opaštajat šekä kučutut vierahat tuttavuššettih lapšie karjalaiseh kulttuurih, folklorih ta kieleh.
– Leirin ohjelma oli hyvin monipuolini, kertou luokanopaštaja Tatjana Kuteleva. – Pedagogit Viktorija Soldatova, Marina Perttunen ta Marija Mitina piettih lapšilla kielituntija. Koululaiset paistih karjalakši ta leikin muovošša opaššuttih šanoja ta virkkehie.
Irina Ševaldova järješti koululaisilla Olijako työ Karjalašša -kvesti-pelin. Šiinä opaštujat šuatih tietyä äijän mukavua Kalevala-eepossašta, kintahista, šiäkšistä ta marjoista šekä maisseltih varen’n’ua. Ol’ga Davžuk ta Jekaterina Kuprijanova vietettih pihalla rahvahankisoja.
Kalevalan runojen šeutu -muasteri-opissa muusikko Andrei Kuleša opašti koululaisie kekšimäh omie šävellykšie. A Galina Melehova Karjalaisien runojen aapini -muasteri-opissa šelitti lapšilla, jotta šanoja voipi kirjuttua latinalaisilla ta kirillisillä kirjaimilla šekä äšen käyttyän riimukirjaimie.
– Mie opaššin lapšie luatimah karjalaisie tilkkukukloja, kumpasie vanhoista ajoista pietäh šuojeluesinehenä, jatkau kertomušta Tatjana Kuteleva. – Šamoin opaštujie oikein miellytettih pes’s’outat Viena-šeuran jäšenien kera. L’udmila Tihonova kerto karjalaisešta puvušta ta esitti omua hartiepaikkojen kokoelmua. Illanistujaisien lopušša kaikin juotih čäijyö krinkelien kera.
Niin mukavašti koululaisilla oli järješšetty kevätloma. Toivottavašti, šemmoset kielileirit tullah perintehellisekši tapahtumakši.
