Kulttuuriforumi yhistäy šuomelais-ugrilaisie kanšoja
Forumih tulou tutkijie, etnografija, käsityömuasterija, Käsityötalojen johtajie, solistija ta taitoryhmie Venäjän erilaisista šuomelais-ugrilaisista tašavalloista.
Forumin tarkotukšena on kertuo ta näyttyä omua kokemušta, mitein šäilyttyä ta popularisoija šuomelais-ugrilaisen muailman ainutluatusie perintehie. Ohjelman rajoissa pietäh tietokäytännöllini seminari, luovie vaštautumisie, näyttelyn avajaiset Petroskoissa šekä konserttiohjelmat Priäžän ta Aunukšen piirilöissä.
– Šuurimpana tapahtumana on konsertti Petroskoin konservatorijašša, missä esiintyy Petroskoin, Salehardin, Siktivkarin, Joškar-Olan ta Iževskin luovie ryhmie ta artistoja. Vierahie vuottau miellyttävä tutuštumini käsityö- ta musiikkiperintehih. Forumissa šuau kuulla šamanien taikašanoja, Ob’-ugrilaisien kanšallisien šoittimien iänijä, nähä pohjoiskanšojen perintehellisie tanššija šekä tuttavuštuo eri kanšojen käsitöih ta folklorih, kertou projektin johtaja Inga Gajevskaja.
Pieni kotimua – ihmishenken hete -projektie toteutetah Karjalan, Udmurtijan, Komin, Mari Elin tašavalloissa, Tverin alovehella, Hanti-Mansiiskin ta Jamalo-Nenetskin piirilöissä. Šen järještäjänä on Kredo-runoušteatteri ta rahottajana Presidentin granttien šiätijö.
