Kontupohjan kyykkäpeluajat šuatih apuo Karjalan piämieheltä kyykkäpelie kehittämisekši. Šen projekti on jo valmis. Uuvvella kentällä on nellä kyykkäpeltuo, kumpasilla šamah aikah voipi pelata kahekšan joukkuo.
— Šillä kentällä, kumpasella myö peluamma ta harjottelemma nyt rakennetah uutta objektie, a meilä annettih uuši paikka, šen jälkeh, kun myö kirjuttima kirjasen Artur Parfenčikovilla. Nyt kaikki asiepaperit on valmissettu ta kevyällä aletah rakennušruavot. Myö kunnoššamma nellä kyykkäpeltuo ta yksi pelto gorodki-pelie varoin. Šitäki tahomma kehittyä, jotta meijän kilpailuih tulis enemmän peluajie eri kaupunkiloista, šelitti Kontupohjan kyykkäaktivisti, kilpailujen järještäjä ta tuomari Danil Brovin.
Kontupohjašša pietäh tašavallan ta Venäjän kyykkäkilpailuja aikuhisie ta koululaisie varoin. Iče Kontupohjan joukko käypi Venäjän kilpailuissa ta aina opaštuu. Kontupohjašša niise valmissetah tuomarie. Ainasie peluajie on viisi henkie, harraštajie — viisitoista. Uuši kyykkäkenttä tulou šuurekši panokšekši Karjalan kyykkäfederatijon toiminnan kehittämisekši.
Tänä vuotena Kontupohjašša ruvetah pitämäh kilpailut, ka niijen paikašta ei ole vielä šelvitetty. Voit olla koulun stadioni tulou šopivakši väliaikasekši paikakši. Enši kilpailut pietäh jo tuiskukuušša. Niih tulou peluajie Karjalan piirilöistä ta Venäjän eri alovehilta.