Kodimailla-forumi jatkuu Tverin Karjalašša
Karielan kodi -talo otti vaštah yli 50 vierašta Tverin, Moskovan, Leningradin, Tambovin alovehilta šekä Karjalašta ta Šakšašta. Viisi päivyä hyö ruvetah opaštumah luatimah käsitöitä, tanššimah, esittämäh spektaklie, pakajamah karjalakši.
— Tämä on yhekšäš Kodimailla-forumi. Tänä vuotena šen keškinäisenä teemana on karjalan kieli. Myö ymmärtimä, jotta još myö emmä šäilytä kieltä ei jiä kulttuurie alkuperäisenä ilmijönä, šano festivalin järještäjä Marina Jevgrafova.
Männyön kahen päivän aikana festivalin ošallistujat opaššuttih karjalan kieltä alku- ta jatkotašojen kurššilla, tiijuššettih hyövyllisien heinien käytöštä, opaššuttih luatimah vöitä, kukloja, ompelomah räččinöjä, lämmittämäh šavukylyö, luatimah puuašteita.
— Šuovattana meilä on teatteriohjelma. Muasteri-oppija pietäh ammattilaiset näyttelijät ta ohjuajat. Myö kačomma ta valmissamma spektaklija Kalevala-eepossan mukah, lisäsi Marina Jevgrafova.
Etnoforumin järještäjät ta ošallistujat toivotah, jotta perintehet šäilytäh ta ihmisillä šyntyy kiinnoššušta kieleh ta kulttuurih. Forumi pietäh Tverin alovehen halličukšen raha-avulla. Uutisie forumin mänöštä voipi löytyä #kodimailla heštegin kautti Vkontakte-sosialiverkošša.
