Karjalah tuli tovellini lumisa talvi. Onnakko monet ihmiset pakkaseh kaččomatta aktiivisešti vietettih talvilomua luonnon helmašša. Niin, 8. pakkaiskuuta karjalaisen kulttuurin Viena-šeuran šeiččemen jäšentä järješšettih hiihtoretki Kontokkijärvellä.
– Meijän hiihtomatan pivuš kešti noin viisi kilometrie ta kulki kaunehen časoun’an kautti, mi šeisou ihan Kontokkijärven rannalla. Matan tarkotukšena oli yhtehini ajanvietto kaunehena pakkaispäivänä, kerto Viena-šeuran jäšen Julija Filippova.
Karjalaisen kulttuurin Viena-šeuran jäšenet, kahenkymmenen aštehen pakkani, Kontokkijärvi, šukšet, kuuma čäijy termossista – näistä ošista kokoutuu Jurii Vizborin Karjalaisien järvien etähäisyöt (Karjalaini valšši) -laulun šanat, kumpasen Karjalah mieltynyt runoilija kirjutti 1956 vuotena.