Karjalašša myönnettih valtijolliset palkinnot
Liäkärit, opaštajat, kulttuuri- ta taloušalan ruatajat šuatih eklein valtijolliset palkinnot. Ceremonija piettih Karjalan kašallisen musejon salissa.
Federallisie ta tašavallallisie palkintoja anto Karjalan piämieš Artur Parfenčikov. Viime vuosi oli vaikiena tervehyšhuoltoalalla ta šentäh palkintojen šuajien luvettelošša on äijän liäkärijä.
– Viime vuuvven vaikeukšet näytettih, jotta meijän omamualaiset voijah keštyä kaikki. Eri alojen ruatajien: opaštajien, liäkärien, sosialialan ruatajien, rakentajien, volontöörien piti ratkaissa pandemijan aikana uušie ammattitehtävie. Kunnivomerkkijä annamma tänäpiänä niillä, ket šuatih erinomasie tulokšie omašša ruavošša, šano Karjalan piämieš.
Presidentin palkintoja šai monta liäkärie, ken taisteli koronavirussie vaštah, näytti omua ammattitaituo ta rohkeutta. Tašavallan palkintoja šai eri alan ammattilaiset: opaštajat, inšenerit, tervehyšhuoltoalan spesialistit, lehtimiehet, kulttuurialan ruatajat.
Palkintojen šuanuot kiitettih omie ruatokollektiivija, kerrottih šuunnitelmista. Karjalan piämieš onnitteli kaikkija ta kiitti šuurešta panokšešta tašavallan kehittämiseh.
