Tänävuon Karjalan eläjil talviloma ozavui: lumisiät da ei kovat pakkazet pyzytäh joga päiviä. Oza on andanuh kätty kalastajil. Rohkiembat kalastajat porattih jiädy vie mennyön vuvven lopus. Toizet tässäh ollah ajonevvon ečos. Oman Muan toimitus tiijusti, mittumua ajonevvuo kyzytäh Karjalan kalastajat.
— Pidihäi vuozi tagaperin ostua, nygöi ylen kallehet ollah, sanoi egläi mies Petroskoin erähäs laukas motorregyzii kaččojes.
Motorregyzien hindu oli 1 649 000 rubl’ua.
— Tänävuon enimite ostetah motokoirii. Hos net ei anneta mostu draivua, ga maksetah äijiä huogehembi motorregyzii. Kel pidäy vaiku kalastukseh niškoi, ga hyvin pädöy, kerälgi niidy voibi ottua — pritseppah panna, sanou myöjy Andrei.
Petroskoispäi kai avtoubusoil ajetah kalastamah rahvas Ukšjärvele. Net, tiettäväine, kalastetah rannas. Paikallizet opitah piästä omile kalakohtile motokoiril libo motorregyzil.
— Täs jiä on 16 santimetrii, kaččokkua, voibi kalastua. Minul ku motokoiru olis, ga hyvä olis, kalastazin omas kohtas, kui kezälgi, a nygöi lundu on polvessah, jygei on kualua kaksi kilometrii, sanou Nuamoilan eläi Mihail.
Nuamoilan rannas pieneh suaressah on läs 500 metrii. Suaren tagan kalua pyydämäs on Sergei. Mies tuli sinne kvadrosiklal.
— Kala näykkyy, kaččokkua, vaste tulin, ga jo nelläs on, sanou Sergei.
— Mindäh kvadrosiklal tulit, hyvingo ajau moizes lumes?
— Tottu sanuo, ei… hos joga ratas vedäy, ga lumi on märgy, odva ajan.