ECHO-liitto valiččou parahan etnokeškukšen
ECHO-liitto ilmotti kilpailun etnokulttuurikeškukšien kešen. Šen aikana valitah paraš laitoš vuuvven 2022 toiminnan tulokšien mukah.
— Vuotena 2022 myö annamma erikoista huomijuo šiih, mitein etnokeškukšet käytettih uušie muotoja ruavošša paikallisien eläjien kera. Tänä vuotena liitto omisti šillä äijän tapahtumie. Niin kuin kilpailun kaikkina vuosina myö valičema parahan keškukšen, parahan keškukšen projektin ta parahan alottehen, šelitti ECHO-liiton spesialisti Ol’ga Stepanova.
Hakemukšie kilpailuh otetah vaštah pakkaiskuun 25. päiväh šuaten. Šiitä liiton spesialistit ta heijän partn’orit valitah, min keškukšen projekti, joukko tahi aloteh kaikešta enemmän vaikutti etnokeškukšen kehittämiseh, toiminnan luajentamiseh ta yleisön kuččumiseh ruatoh.
Kilpailuh voijah ošallistuo Karjalan etnokeškukšet, kulttuurilaitokšet, ei-kaupalliset järješšöt, kumpaset ruatah etnokulttuurialalla.
Joka vuosi vuuvvešta 2015 alkuan Karjalašša valitah männyön vuuvven paraš etnokeškuš. Kilpailun tarkotukšena on noštua kylien ta kaupunkien istorijallis-kulttuurista merkityštä, käyttyän uušie keinoja etnokulttuuriperinnön šäilyttämiseššä, parentua etnokeškukšien ruatajien ammatillisie neroja.
