Šatokaš turnauš Karjalan kyykkäjoukolla
Heinäkuun 9.–10. päivinä Čerepovetsissa piettih kyykkä-pelin Venäjän meštaruš. Karjalan joukko otti ošua yksityis- šekä joukkokilpailuih. Karjalan joukkoh kuulu 16 urheilijua Petroskoista, Kontupohjašta, Kalevalašta, Vieljärveštä ta Sortavalašta. Kaikin hyö ollah Karjalan kilpailujen voittajat.
Kilpailun parahana tulokšena on Jevgenii Karakinin voitto mieškilpailušša. Hiän tuli Venäjän meštariksi ta šai urheilumeštarin ehokkahan statussin.
– Karjalan naisjoukko piäsi kolmannella paikalla, miešjokko – viijennellä. Yksityiskilpailuissa naisien kešen Žanna Tikkanen on toisella paikalla. Niise pitäy panna merkillä, jotta Natalja Petrova šuoritti urheilumeštarin ehokkahan statussin šuamisen vuatimukšie, šelitti Karjalan kyykkä-joukon johtaja Jevgenii Karakin.
Venäjän meštaruoh otti ošua yli 50 peluajua Venäjän yhekšäštä alovehešta. Kilpailuja perintehellisešti pietäh Čerepovets-kaupunkin istorijallis-etnografisešša musejošša – Gal’skien talon pihašša.
Viime vuosina kyykkä-peli šai šuurta kehityštä ta še otettih Venäjän tai muailman tašon kilpailuih. Nyt joka halukkahalla ei ole mahollisutta ošallistuo Venäjän kilpailuh. Šiih voijah tulla vain ne, ket šuatih urheiluluokka alovehellisen tašon kilpailuissa.
