1.
– Terveh! Mistä aššut?
– Terveh! Olin kaupašša.
– Oššitko mitä?
– Oššin kaunehen paijan.
– No nyt šiula on mitä panna piällä Uuvvekši Vuuvvekši.
2.
– Voisitko šuoriutuo rutompah? Miula ei ole aikua vuottua šilma.
– En voi! Ei ole mitä panna piällä.
– Mitein ei ole? Šiula on kaunis mekko. Še rippuu škuapissa.
– Še on vanha. Uutta mekkuo miula ei ole.
– Konšapa še kerkisi vahneta? Šie oššit šen vašta viime kuukauvešša.– Mie pesin šen ta še kučistu. Nyt še on lyhyt.
3.
– Lähetkö kyläh šuovattana?
– Lähen tietyšti.
– Milläpä lähet?
– Ka lähen omalla autolla. Muissat vet, jotta oššin uuvven. Nyt miula on mušta BMW-auto.
– Otatko milma matkah?
– Otan, tule vain ajoissa.
Oma armaš kaunis on,
Vaikka on kaitaluini.
Hei-juu ta ralla-llei,
Vaikka on kaitaluini.
Piä on šillä pähkinä,
Vaikka vähän viäräh.
Hei-juu ta ralla-llei,
Vaikka vähän viäräh.
Šilmät on šillä šiniset,
Vaikka on kierollaiset.
Hei-juu ta ralla-llei,
Vaikka on kierollaiset.
Šuuhan šillä on šupukka,
Vaikka on toista šyltä.
Hei-juu ta ralla-llei,
Vaikka on toista šyltä.
Nenähän šillä on n’upukka,
Vaikka on kirvešvartta.
Hei-juu ta ralla-llei,
Vaikka on kirvešvartta.
Tukka tummanruškie on,
Vaikka on tappuraini.
Hei-juu ta ralla-llei,
Vaikka on tappuraini.
Kun mie vien šen markkinoih,
Ni heposetki nakrau.
Hei-juu ta ralla-llei,
Heposetki nakrau.