Veškelys: Karjalan kieli tuli nägövih
Veškelykses luajittih läs sadua kaksikielisty pihoin nimilaudastu livvikse da ven’akse. Veškelys on karjalazien perindölline eländypaikku. Läs 60 protsentua eläjii ollah livvinkarjalazii.
— Paikallizet eläjät tahtotah, gu livvinkarjal tulis tuttavakse kylänymbäristöh, olis enämbäl nägövis, Oma tulehmo -yhtistyksen piälikkö, projektan koordinuattoru Irina Pogrebovskaja sanou.
Nygöi luajittih läs sadua kaksikielisty pihoin nimilaudastu. Enzimäi nimilaudazet pandih taloloih, kudamis rahvas eletäh ymbäri vuvven. Vie tahtotah luadie pihoin nimilaudazet kezämökkilöih.
Veškelyksen pihoin nimet on kiändänyh karjalakse Karjalan tazavallan karjalan da vepsän kielen termistö- da oigiehkirjutuskundu. Karjalan tazavallas on toiziigi kylii da linnoi, kudamis on kaksikielizii pihoin nimilaudazii. Jo vuozi tagaperin karjalan- ja ven’ankielizii pihoin nimilaudazii oli Petroskoisgi.
— On hyvä nähtä kaksikielizii nimilaudazii Karjalan kansallizis alovehis, tazavallan piälinnasgi. Mulloi niidy rodih vie enämbi. Tämä on hyvä virites karjalan kielen kehityksele, Pyhäjärven juuret - yhtistykseh kuului Aleksandr Pšennikov sanou.
Nygöi karjalakse on kiännetty läs 1 600 Petroskoin pihoin da paikannimilöi, ruado vie jatkuu.
Aihies voit lugie ven'aksegi.
