Pirttilahešša avattih uuvvissettu Taipale-talo
Gundirevien šukutalo on Taipale-paikašša, Pirttilahen kyläššä. Perintehellini karjalaini talo korjattih ta uuvvissettih. Šen avajaisilla omissettih pruasniekka.
– Täššä talošša eli ennein Marija Kallio tahi Taipalen Muarie, kuin häntä kučuttih. Hänen anšijošta on šäilyn tämä talo alkuperäseššä kunnošša. Vuotena 2019 oli luajittu šuuri restaurointi, rakennettu saraja ta navetta, a vanhat hirret oli vajehettu uušiksi, kerto talon isäntä Leonid Gundirev talon avajaisissa.
Pirttilahen pruasniekkah keräyty vierahie Vuokkiniemeštä, Koštamukšešta, Petroskoista šekä oli äšen vieraš Jegiptistä. Kuin ni joka perintehelliseššä pruasniekašša Taipalen juhlan ohjelmašša oli äijän huvitukšie, leikkijä, tanššija ta lauluja šekä makieta karjalaista šyömistä.
– On mukava, jotta myö voima keräytyö tiälä kešällä ta keškuššella toini toisen kera. Onnekši oli hyvä šopiva šiä ta nuoret oltih meijän kera. Hyö ollah innoššuttu pakajamah karjalakši ta pitämäh karjalaisie perintehellisie toimenpitoja, šano Arhippa Perttusen šiätijön johtaja, pruasniekan vieraš Ol’ga Lehtinen.
Pruasniekkah keräyty muutoma kymmenen vierašta, ka Taipalen paikka voipi ottua vaštah noin šata vierašta ta jokahisella löytyy miellyttävyä ruatuo.
– Kyläššä voipi kaččuo vanhua taluo ta yrittyä ruatua perintehellisie karjalaisie ruatoja: jauhuo jauhinkivilöillä, niittyä heinyä, šahata, kalaštua, lämmittyä kylyö, lisäsi Leonid Gundirev.
Pruasniekka järješšettih Gundirevien perehen avulla Arhippa Perttusen šiätijön Yhteinen Viena -projektin rajoissa.
Lisyä pruasniekašta lukekkua täššä.
